Horietako lauk euren derrigorrezko praktikak CIC energiGUNEn egitea erabaki zuten, eta hirugarren seihilekoan Amiensen ikasitako beste ikasle bat ere gehitu zitzaien. Bostak laugarren eta azken seihilekoa amaitzen ari dira, Master Amaierako Lana egiteko helburuarekin, eta horietako batzuek CIC energiGUNEn geratzeko interesa adierazi dute.

Horietako bat Nahom Enkubahri da, Etiopiako ikaslea eta 2019-2021 deialdian CIC energiGUNEren bekadun izandakoa. “Asko gozatu dut esperientzia, bereziki, ikertzaileak bikainak direlako eta instalazioak lehen mailakoak eta gure prestakuntzarako ezin hobeak direlako”, esan du. “Izan ere, behar genuen guztia eskura genuen, irakasleen kalitatea, eta zentroaren antolaketa eta harrera ahaztu gabe. Oso esperientzia emankorra izan da, eta beraz, asko pozten naiz Euskadira etortzea aukeratu izanagatik”.

Aurtengo irailean hasiko da 2020-2022 deialdiaren hirugarren seihilekoa, eta nazioarteko hainbat ikasle etorriko dira berriro ere EHUko Ingeniaritza Eskolara eta CIC energiGUNEra. “Oso pozik gaude ikasleen mailarekin eta MESC+ programak eskaintzen duen nazioartekotasun izaerarekin, baina Euskadiko askoz eskatzaile gehiago egotea gustatuko litzaiguke, energia biltegiratzea etorkizuneko lanbidea baita”, adierazi du Nuria Gisbert CIC EnergiGUNEko zuzendari nagusiak. “Ikasleen esperientzia ahalik eta onena izan dadin ahalegintzen gara, eta horrek eragina du talentua erakartzeko dugun gaitasunean; izan ere, gurekin praktikak egin dituzten ikasle asko guregana itzuli dira tesiak egitera”.

MESC+ Erasmus Mundus masterra, ekonomia deskarbonizatuaren behar eta erronka berriei begira kualifikazio handiko prestakuntza-programa nagusietakoa da. Izan ere, 2021-2023 ediziorako, 17 urteko historian izan duen eskaera-kopuru handiena lortu du, 30 plazatarako 315 eskaera jaso baititu. Kopuruari dagokionez, Pakistanetik, Nigeriatik eta Indiatik jasotako eskaerak nabarmendu behar dira. Nazioartekotasun mailari dagokionez, partzuergoak gogorarazi behar du aurreko deialdian 22 herrialdetako 30 ikasle hautatu zirela, eta duela bi urte 19 naziotako 28 ikasle izan zirela.

Era berean, eta Masterraren ospea eta ikasleen gero eta interes handiagoa dela eta, hautagaiek oso hautaketa-prozesu zorrotza gainditu behar dute. Genero-ikuspegitik, azpimarratu behar da gizonek askoz ere eskaera gehiago egin dituzten arren (% 75-% 25), azken urteetako azken hautaketan, eta soilik merezimenduetan oinarrituta, erabateko parekotasuna ari dela lortzen, eta horrek emakumeek aurkeztutako eskaeren kalitate maila handia erakusten du.