AURKITU INTERESGARRIA DITUEN EDUKIAK
CIC energiGUNEk, siderurgiari labeetako hondar-beroa berrerabiltzeko aukera emango dion beroa birsortzeko eta elektrizitatea sortzeko instalazioaren prototipo bat eraikiko du
CIC energiGUNE

ArcelorMittalek Sestaon (Bizkaia) duen lantegian instalatuko da prototipoa, ingurumen-onurak “in situ” neurtzeko eta ereduaren erreplikagarritasuna errazteko helburuarekin.

CIC energiGUNEk, baterietan, energia termikoko soluzioetan eta hidrogenoan erreferentea eta Basque Research & Technology Alliance-BRTAko kidea den euskal ikerketa-zentroak, beroa eta elektrizitatea modu konbinatuan ekoizteko planta berritzaile baten eraikuntza koordinatuko du, siderurgiak arku elektrikoko labe bateko keetan dagoen hondakin-beroa berrerabili ahal izan dezan. Ekimena euskal zentroa buru den HI4S (Heat It yourself For Sustainability) proiektuaren barruan dago, eta 1,5 milioi eurorekin finantzatuko du Europar Batasunak, Ingurumenari buruzko LIFE programaren bidez.

“Errendimendu osoan dagoen planta siderurgiko batean eskala errealeko prototipo bat eraikitzeko eta instalatzeko aukerak proiektua balioztatzeko agertokirik onenean jartzen gaitu”, adierazi du Iñigo Ortega CIC energiGUNEko ingeniari eta proiektuaren ikertzaile nagusiak. “Gainera, ziur gaude industria siderurgikoaren energia-kudeaketa hobetzeaz gain, beste arlo batzuetan ere lagunduko diegula, hala nola azpiproduktu solido baten (zepa beltza) balorizazioan”, gaineratu du Daniel Bielsa CIC energiGUNEko Teknologia koordinatzaileak.

CIC EnergiGUNEk koordinatzen duen HI4S partzuergoak beste sei bazkide ditu: ArcelorMittal, Fivemasa, Enerbasque, Life Cycle Engineering-LCE, SDEA Solutions eta Azterlan. Hain zuzen ere, ArcelorMittalek Sestaon (Bizkaia) dituen instalazioek berreskuratze-plantaren prototipoa hartuko dute, lortu gura diren ingurumen arloko onurak lekuan bertan aztertzeko eta Energia Kontsumo Handiko beste industria batzuetan erreplikagarritasuna aztertzeko.

Ildo horretan, nabarmentzekoa da HI4S dela CIC energiGUNEk eskala errealean industrian ezarritako biltegiratze termikoko eta beroa berreskuratzeko bigarren soluzioa. Aurrekoa 2019an amaitu zen, REslag proiektuaren (CIC energiGUNEk bere historian gidatutako lehen proiektu europarra) barruan, eta hor ere ArcelorMittalen laguntza izan zuen. Kasu horretan, CIC energiGUNEk, altzairugintzako zepa balorizatzeko atea ireki zuen 1/10 eskalako prototipo erakusle bat garatu zuen.

Osagarri gisa, HI4S proiektuak tenperatura altuko iragazketa-sistema eraiki eta balioztatu nahi du, bero-trukagailuen ohiko buxadura-arazoak saihesteko eta horrekin lotutako isurketen kostuak murrizteko. Era berean, hainbat funtzionamendu-modu ahalbidetuko dituen eta altzairutegian urtean 37,5 GWhe inguru aurrezteko aukera emango duen hondar-beroa berrerabiltzeko sistema malgua, errentagarria eta jasangarria garatu nahi du.

Proiektuaren emaitza espezifikoak, industria-ingurune operatibo batean balioztatutako prototipo bat eraikitzeaz gain, teknologia hori Energia Kontsumo Handiko Industrietan aplikatu ahal izateko erabakiak hartzeko tresna fidagarri bat lortzean zehaztuko dira, eta baita jasangarritasunaren ebaluazio-txosten batean ere. Azken horrek teknologiaren onurak frogatuko ditu, ingurumen, ekonomia eta gizarte arloetako eraginak kontuan hartuta.

Ildo horretan, HI4S proiektuak ingurumen-inpaktu nabarmenak sortzea aurreikusten da, hala nola, altzairutegietako CO2 isuriak urtean 9 tona murriztea (hau da, siderurgiaren guztizko isurketen % 6 murriztea), edo azpiproduktuak, zepa beltza, urtean 560.000 tona murriztea (EBn sortutako guztizkoaren % 10-15). Ondorioz, energia-kontsumoa murrizteak urtean 200 M€ aurreztea, eta berreskuratutako energiak (37,5 GWh/urtean) arku elektrikoko labearen kontsumo elektrikoa % 4,9 aurreztea ekarriko luke.

HI4S proiektuak, halaber, CIC energiGUNEk biltegiratzearen eta kudeaketa termikoaren arloan duen posizioa indartzen lagunduko du, zentroak ORC plus proiektuaren barruan garatutako hirugarren soluzio batekin bat egiten baitu. Kasu horretan, Marokon dagoen eguzki-kontzentrazioko planta bat da, instalazioaren eskariaren araberako ekoizpen-ahalmena hobetzea helburu duena, eguzki-argia dagoen ala ez kontuan izan barik.

Nuria Gisbert CIC energiGUNEko zuzendari nagusiak gogorarazi duenez, “Green Deal eta PNIEC delakoen testuinguru berrian, industrian energia-eraginkortasuna funtsezkoa izango da, eta beroa biltegiratzeko eta berreskuratzeko CIC energiGUNEren teknologiek aurrerapen handiak ematen dituzte arlo horretan; beraz, ziur gaude horrelako biltegiratze termikoko soluzioek bultzada handia emango dutela Europak ezartzen dituen energia-eraginkortasunaren helburuetan aurrera egiteko.

Cookies on this website are used to personalize content and advertisements, provide social media features, and analyze traffic. You can get more information and configure your preferences HERE

Baztertu cookieak
Onartu cookieak
Cookieak konfiguratu
Bideo hau ikusteko marketineko cookieak onartu behar dituzu, hemen konfiguratu daiteke