CIC energiGUNE, energia elektrokimikoaren eta energia termikoaren biltegiratze eta bihurketan erreferente den euskal ikerketa-zentroak, 10 zientzialari ditu munduko ikertzaile eragin handienekoen artean Stanford Unibertsitateak eta Elsevier argitaletxe akademikoak egindako rankingaren edizio berrian.
Emaitza rankinga osatzen duten bi modalitateak kontuan hartuta lortu da: alde batetik, 2025eko eragin zientifikoa zehazki aztertzen duen sailkapena, non CIC energiGUNEk 9 ikertzaile dituen; eta, bestetik, ikerketa-ibilbide osoan metatutako eragina ebaluatzen duena, non zentroko 5 zientzialari agertzen diren.
Lau ikertzaile bi sailkapenetan agertzen direnez, guztira CIC energiGUNEko 10 zientzialari desberdin daude gutxienez bi rankingetako batean.
Sailkapenean agertzen diren ikertzaileak honako hauek dira: Michel Armand, Heng Zhang, Javier Carrasco, Montse Casas-Cabanas, Damien Saurel, Elena Palomo del Barrio, Yaroslav Grosu, Max García-Melchor, Shanmukaraj Devaraj eta Daniel Carriazo.
Michel Armand, euskal ekosistema zientifikoko 1. ikertzailea
Michel Armand irakaslea, CIC energiGUNEko ohorezko zuzendari zientifikoa, zentroko emaitzen buru da berriro ere, eta nazioarteko erreferentziazko postuak lortu ditu.
Armand munduko 506. postuan dago 2025eko eragin zientifikoari dagokion rankingean, autoaipuak kontuan hartu gabe, eta, horri esker, euskal ekosistema zientifikoan posiziorik onena duen ikertzailea da. Bere espezializazio-eremuaren barruan, munduko 15. postua du energiaren arloan, 370.000 ikertzaile baino gehiagoko unibertso batean.
Bere lidergoari eutsi dio bere ibilbide zientifiko osoan metatutako eragina kontuan hartuta ere: Michel Armand munduko 659. postuan dago eta munduko 10. postuan energiaren arloan, hau da, gutxi gorabehera bere espezialitateko ikertzaile onenen %0,003aren artean.
“Michel Armanden emaitzak apartekoak dira eta harrotasun handia dira CIC energiGUNErentzat, baina edizio honen benetako balioa da lidergo horren atzean nazioarteko eragin zientifikoa duen ikertzaile-masa kritiko gero eta zabalagoa dagoela egiaztatzea. Sailkapen hauetan hamar zientzialari izateak gure proiektu zientifikoaren sendotasuna eta lehen mailako talentua erakartzeko, garatzeko eta sendotzeko dugun gaitasuna erakusten ditu”, adierazi du Montse Casas-Cabanasek, CIC energiGUNEko elektrokimika arloko zuzendari zientifikoak.
