CIC energiGUNE, energia biltegiratze eta bihurketa elektrokimiko eta termikoaren arloko euskal erreferentziazko zentroa, bazkide gisa parte hartzen ari da M-BAT – Battery-grade materials recovery from primary and secondary sources through innovative technologies europar proiektuan. Horizon Europe programak finantzatutako ekimen horren helburua da Europar Batasunak lehengai kritikoekiko duen mendekotasuna murriztea, baterietarako funtsezko materialak berreskuratzeko teknologia jasangarriak garatuz eta eskalatuz.
IDENER buru duen proiektuak 18 bazkidez osatutako partzuergoa biltzen du, eta 42 hilabeteko iraupena izango du, 2026ko maiatzaren 1etik aurrera. Bere helburua da lau teknologia berritzaileren eskalatze industrialean aurrera egitea, TRL 6/7 mailetan, nikela, kobaltoa, manganesoa, litioa eta grafitoa ekoizteko Europako iturrietatik abiatuta; besteak beste, meatzaritzako hondakinetatik, lohi industrialetatik, bizitza erabilgarria amaitu duten litio-ioizko baterietatik datorren black mass-etik eta mineraletan aberatsak diren ur geotermaletatik.
Testuinguru horretan, CIC energiGUNEk baterietako materialen eta teknologien inguruan duen ezagutza espezializatua jarriko du proiektuaren zerbitzura, bereziki berreskuratutako materialak sektoreko aplikazio errealetan erabiltzeko baliozkotzearekin lotutako zereginean. Ekarpen horri esker, lortutako materialek industriaren eskakizun teknikoak betetzen dituzten ebaluatu ahal izango da, eta berreskuratze-prozesuen eta baterien Europako balio-katean etorkizunean izango duten integrazioaren arteko lotura indartuko da.
