Nuria Gisbertek CIC energiGUNEk, energia elektrokimikoaren biltegiratzean, energia termikoaren biltegiratzean eta bihurtzean eta hidrogenoaren teknologietan erreferentea den euskal ikerketa-zentroko Zuzendari Nagusiak, goi-mailako zuzendaritzan emakumeen talentua sustatzen duten zuzendaritza taldeetako kideek osatutako WITH sarearen “Emakume Liderrak 2024” Saria jaso du. Sariak emateko ekitaldia atzo gauean izan zen, Bilboko Guggenheim Museoan ospatutako zeremonian. 300 pertsona baino gehiago bertaratu ziren, eta horietatik 150 Estatu osoko zuzendaritza taldeetako emakumeak izan ziren.
“Ohore handia da emakumeen talentuak enpresa-proiektuak gidatzeko duen gaitasuna egunero ezagutzen, partekatzen eta erakusten duten beste emakume batzuen aintzatespena jasotzea” adierazi du Nuria Gisbertek saria jasotzean. “WITH sarea bezalako ekimenak funtsezkoak dira, ez bakarrik emakume liderrak bilduko dituen ekosistema propioa sortzeko, baita emakume gazteak inspiratzeko ere, horrek bermatzen baitigu lidergo-eredu berri hau sendotzea”, amaitu du.
Aurten “Emakume Liderrak” sarien bigarren edizioa ospatu duen WITH sareko arduradunek era berezian baloratu dute Nuria Gisbertek energia biltegiratzearen arloan nazioarteko erreferentzia bihurtu den CIC energiGUNEn izan duen ibilbide profesionala. Hori guztia, gainera, langile taldearen osaeran gizonen eta emakumeen arteko parekotasun-egoerari eusteagatik nabarmenduz, aukera-berdintasunean eta zeharkako gaitasunen garapenean oinarritutako ereduari esker, mentoring-a eta coaching-a sustatuz, antolamendu-kultura hori sendotzeko funtsezko tresna gisa.
Ildo horretan, WITHek balioan jarri nahi izan du “Nuria Gisbert galan egotea, beste hainbat emakume liderrekin batera, inspirazioa eta pizgarria izango dela bertan dauden pertsona guztientzat”.
Enpresa Zuzendaritzan doktorea eta Industria Ingeniaria, Nuria Gisbertek 20 urte baino gehiagoko esperientzia du energiaren sektorean. CIC energiGUNEko Zuzendari Nagusi kargua hartu aurretik, CIC microGUNEko Zuzendari Nagusia izan zen. Sektore pribatuan energiaren arloko hainbat ardura-postu bete ondoren iritsi zen hara. Gainera, Innobasqueko Zuzendaritza Batzordeko kide eta Zientzia, Teknologia eta Berrikuntzarako Euskal Kontseiluko Aholku Batzorde Zientifikoko kide da. Era berean, funtsezko zeregina izan du CIC energiGUNEren bi spinoff-ak sortzeko orduan: Bcare eta Basquevolt.
“WITH Emakume Liderrak” II. Galan autonomia-erkidego guztietatik Bilbora etorritako hainbat sektore profesionaletako, belaunaldi desberdinetako eta zeharkako profiletako emakumeak bildu ziren. Gala Lidergo Eredu Berrien Astearen parte da. Egoitza Bilbon duen ospakizun kolektibo horrek enpresa-munduko lidergoari buruz eta haratago hausnartzeko balio du. WITH Sareak Bilbon du egoitza, eta zuzendaritza taldeetako 125 emakume baino gehiago ditu mundu mailako enpresa eta korporazioetan. Horien artean daude Nazio Batuak, 3M, Bupa, Repsol, Zscaler, Merz Aesthetics, Telefónica, WIZink edo ABB, besteak beste. WITHek, elkarren arteko laguntzaren eta loturaren bidez mundu anitzagoa eta konektatuagoa sustatzen duen Europako eta Latinoamerikako zuzendaritza taldeetako emakume liderren ekosistemarik handiena bilakatu nahi du.
