CIC energiGUNEk, energia elektrokimikoaren eta termikoaren biltegiratzean eta bihurketan erreferentziazko euskal zentroak, bere gaitasunak indartzen jarraitzen du hurrengo belaunaldietako baterietara bideratutako material berrien industrializazioa bizkortzeko. Horrela, enpresei eta garatzaileei laguntzen die berrikuntza-prozesuko fase kritikoenetako bat gainditzen: eskalatzea.
Material berrien aurkikuntza energia-biltegiratzearen arloko ikerketaren ardatz nagusietako bat bada ere, erronka handienetako bat da material horiek modu erreproduzigarrian fabrikatu ahal izatea, laborategian lortutako prestazioak galdu gabe. Prozesu hori balioztatzea erabakigarria da arrisku teknologikoa murrizteko eta benetako industria-aplikazioetara transferentzia errazteko.
“Benetako erronka ez da material berri bat garatzea, baizik eta haren prestazioak galdu gabe modu erreproduzigarrian fabrikatu ahal izatea”, azaldu du Marta Cabellok, CIC energiGUNEko Material Transfer & Upscaling taldeko Research Team Leader-ak. “Kontua ez da soilik material-kantitate handiagoa ekoiztea, baizik eta lote bakoitzak kalitate eta errendimendu berberak mantentzen dituela bermatzea.”
Belaunaldi berriko materialek, hala nola litioan aberatsak diren materialek, siliziozko anodoek edo sodioan oinarritutako kimika berriek, potentzial handia dute baterien energia-dentsitatea, segurtasuna eta jasangarritasuna hobetzeko. Hala ere, haien arrakasta material horiek industria-eskalan modu sendoan, erreproduzigarrian eta lehiakorrean fabrikatzeko gaitasunaren araberakoa ere izango da.
Erronka horri erantzuteko, CIC energiGUNEk materialen transferentzia-prozesu osoa hartzen duten gaitasunak jartzen ditu industriaren eskura: sintesi-prozesuen optimizazioa, eskalatzea, karakterizazio aurreratua, elektrodoen prozesaketa, gelaxketan integratzea eta baldintza adierazgarrietan balioztatzea. Ikuspegi horri esker, garapenaren lehen faseetatik bertatik balizko mugak identifika daitezke, eta ziurgabetasuna murriztu, eskala handiagoko industria-inbertsioei heldu aurretik.
“Industriak frogatu behar du material bat modu koherentean fabrikatu daitekeela, ekoizpen bakoitzean prestazio berberak mantenduz”, adierazi du Marta Cabellok. “Gure helburua da enpresei oinarri tekniko sendoa duten erabakiak hartzen laguntzea, garapen-denborak murriztuz eta industrializazioari ekin aurretik arriskua minimizatuz.”
Eskalatzeaz gain, zentroak materialek prozesaketan eta gelaxka oso batean integratzean duten portaera balioztatzen du; alderdi hori funtsezkoa da laborategian lortutako prestazioak benetako aplikazio batetik hurbil dauden baldintzetan mantentzen direla egiaztatzeko. Ikuspegi integral horrek aurkikuntza zientifikoaren eta trantsizio energetikoa bultzatuko duten baterien fabrikazioaren arteko distantzia laburtzen laguntzen du.
