Horizonte Europa 2021en finantzaketan sartuta dauden eta CIC energiGUNEren partaidetza duten gainerako proiektuei dagokienez, egoera solidoko bateriarekin erlazionatutakoak nabarmentzen dira, arlo horretan euskal zentroa nazioarteko erreferentzia baita. Horrela, ABEE-Avesta Battery & Energy Engineeringek koordinatzen duen ADVAGEN proiektuak litiozko metalezko bateria-gelaxkaren (LiM) teknologia berria garatu nahi du, egoera solidoko elektrolito hibrido seguru, fidagarri eta errendimendu handikoan oinarrituta, mundu mailako lehiarako Europari abantaila lehiakorra lortzea ahalbidetzeko.

PULSELiON, bestalde, RISEk –Suediako Ikerketa Institutuak– koordinatutako proiektua da, eta bere helburua egoera solidoko “Gen 4b” baterien fabrikazioa erraztea da. Bateria horiek litiozko metalezko anodoan, sulfurozko elektrolito solidoetan eta nikelean aberatsa den NMC katodoan oinarritzen dira, laser bidezko deposizio-teknika berri bat erabiliz. KIC Innoenergyk gidatzen duen BEST proiektua ETIP Batteries Europeren idazkaritza tekniko berria izango da. Batteries Europe Europako Batzordeak sustatutako ekimena da, eta bere helburua, ikerketa-komunitatea, industriaren eta akademiaren ordezkari nabarmenak foro batean biltzea da. Foro horrek energia biltegiratzeko sistemei buruzko ikerketaren ibilbide-orriak zehaztu ditu, teknologia berrietatik hasi eta material aurreratuetara, aplikazioetatik igaroz.

GIGAGREEN proiektua, Torinoko Institutu Politeknikoak koordinatua, gelaxken eta elektrodoen osagaiak prozesatzeko tekniken hurrengo belaunaldia bultzatzeko dago diseinatuta, litio-ioien gelaxken fabrikazio-industriaren ingurumen-, ekonomia- eta gizarte-jarduna hobetuko duten berrikuntza iraultzaileak bilatzeko. Era berean, SPINMATEren helburua kontzeptu digital eskalagarria, jasangarria, segurua eta errentagarria duen linea pilotu bat indarrean jartzea da, egoera solidoko bateria-gelaxkak eskala handian fabrikatzeko lehen urrats gisa. Proiektu hori ABEE-Avesta Battery & Energy Engineeringek koordinatuko du.

Baterien arloari buruzko 2021eko deialdian, Europako HORIZONTE EUROPA Esparru Programak berariaz sustatu du 3b belaunaldiko litiozko ioien (gaitasun handikoak eta tentsio handikoak) bateria aurreratuei buruzko proiektuen aurkezpena, elektro-mugikortasunari zein beste aplikazio batzuei begira. Zehazki, finantzatutako proiektuek hiru alderditan emaitzak lortzen laguntzea espero da: kostuan, errendimenduan, segurtasunean, jasangarritasunean eta birziklagarritasunean hobekuntzak ekarriko dituzten litio-ioi aurreratuen bateriak garatzea; energia-dentsitatea handitzea eta, beraz, ibilgailu elektrikoaren gidatze-autonomia handitzea; eta garraioaren eta industriaren sektoreen emisioak murriztea, EBk klimaren neutraltasuna lortzeko egiten dituen ahaleginei laguntzeko.