1. Zer esan nahi du CIC energiGUNErentzat Arizmendiarrieta-Anitua Saria bezalako aitortza jasotzeak, pertsonen eta antolakuntza-kulturaren ikuspegitik?

Sari hau jasotzeak esanahi berezia du CIC energiGUNErentzat, gure proiektuan funtsezkotzat jotzen dugun alderdi bat aitortzen duelako: lan egiteko dugun modua eta hori posible egiten duten pertsonak zaintzeko dugun konpromisoa. Emaitza zientifikoetatik harago, aitortza honek balioa ematen dio gure antolakuntza-kulturari, parte-hartze partekatuan, pertsonenganako eta haien ongizatearekiko konpromisoan, motibazioan eta talentuaren garapenean oinarrituta. Kanpoko babesa da, eta baieztatzen du nazioarteko bikaintasuneko zentro bat eraikitzea posible dela, gure erakundea definitzen duten giza eta gizarte-balioak alde batera utzi gabe.

2. Zein dira CIC energiGUNEko pertsonen kudeaketa-ereduaren elementu bereizgarriak, sari hau jasotzeko gako izan direnak?

Gure pertsonen kudeaketa-eredua hainbat zutabe nagusitan oinarritzen da. Batetik, konfiantzan eta parte-hartzean, pertsonek modu proaktiboan ekarpenak egin eta profesionalki hazteko aukera duten inguruneak sustatuz. Bestetik, aniztasunaren, aukera-berdintasunaren eta malgutasunaren aldeko apustu argia egiten dugu, ulertzen baitugu talde anitz eta orekatuak berritzaileagoak eta erresilienteagoak direla. Gainera, talentuaren garapenean etengabe lan egiten dugu, ikasteko eta profesionalki garatzeko aukerak eskainiz, bai zentroaren helburuekin bai pertsonen asmoekin lerrokatuta.

3. Epaimahaiak lankidetza eta ikuspegi humanista bezalako balioak azpimarratu ditu. Nola islatzen dira balio horiek zentroko eguneroko jardunean?

Balio horiek oso presente daude gure eguneroko lan-moduan. Diziplina anitzeko taldeen arteko lankidetzan, ikertzaileen, teknikari-langileen eta laguntza-arloen arteko harreman hurbilean, eta entzutean oinarritutako kudeaketa irekian islatzen dira. Pertsonak baloratuak, entzunak eta lagunduak sentitzen diren ingurunea sortzea da gure helburua; horrek ongizatea ez ezik, motibazioa, sormena eta berrikuntza ere sustatzen ditu.

4. Nola lortzen da nazioarteko bikaintasun zientifikoa pertsonengan oinarritutako kudeaketa-ereduarekin orekatzea?

Gure esperientziaren arabera, bikaintasun zientifikoa eta pertsonengan oinarritutako ikuspegia ez dira soilik bateragarriak, elkar indartzen dute. Goi mailako talentu ikertzailea erakartzeko eta motibatzeko, lan-ingurune estimulagarria, errespetuzkoa eta inspiratzailea eskaintzea ezinbestekoa da. Horrek esan nahi du estandar zientifiko altuak laguntza-politikeekin, malgutasunarekin, prestakuntzarekin, aitortzarekin eta garapen profesionalarekin uztartzea. Pertsonak zainduak eta konprometituak sentitzen direnean, eragin handiko ezagutza sortzeko eta emaitza bikainak lortzeko gaitasuna biderkatu egiten da.

5. Zer eragin du aitortza honek ikerketa- eta teknika-taldearen motibazioan eta pertenentzia-sentimenduan?

Aitortza hau gehitzen zaio Europako Batzordeak 2019an eman zigun “HR Excellence in Research” zigiluari, gure ikertzaile-talentuaren kudeaketa-politiken bikaintasuna aitortuz, baita 2025eko Mutualia Sarietan lortutako akzesitari ere, Enpresako Aniztasuna kategorian, gure aniztasun eta inklusio estrategiaren berrikuntzagatik. Horrek berresten du bide egokian gaudela eta oso eragin positiboa du taldean, urteetan egindako ahalegin kolektiboaren kanpoko balidazioa baita. CIC energiGUNEko kide izatearen harrotasuna eta pertenentzia-sentimendua indartzen ditu, lana ondo egitea ez dela soilik argitalpen edo proiektuen bidez neurtzen, baizik eta lan egiteko eta elkarrekin harremanak izateko dugun moduan ere. Gainera, etorkizuneko erronkei ilusioz, konpromisoz eta erantzukizun partekatuaz aurre egiten jarraitzeko pizgarri da.

6. Zer ikasgai uzten dizkio sari honek CIC energiGUNEri datozen urteetan erakunde gisa eboluzionatzen jarraitzeko?

Sari honek ikasgai oso baliotsuak uzten dizkigu. Lehenik eta behin, pertsonetan, lankidetzan eta balioetan oinarritutako antolakuntza-eredu baten alde egiteak emaitza sendo eta iraunkorrak sortzen dituela berresten du. Bigarrenik, ez konformatzera eta gure prozesuak, lidergo-moduak eta barne-kultura nola hobetu hausnartzen jarraitzera gonbidatzen gaitu. Aukera bat da eboluzionatzen jarraitzeko, esperientziatik ikasteko eta ingurune zientifiko eta sozialaren aldaketetara egokitzeko, epe luzeko ikuspegiarekin.

7. Aitortza honen ondoren, nora egin nahi du aurrera CIC energiGUNEk kulturari, pertsonei eta lan egiteko moduari dagokienez?

Gero eta irekiagoa, parte-hartzaileagoa eta anitzagoa izango den erakunde baterantz aurrera egin nahi dugu, non pertsonek proiektu komunaren protagonista sentitzen diren. Berehalako neurri gisa, zentroko sentsibilitate guztiak ordezkatzen dituen lan-talde bat sortu dugu Ongizate Psikologikorako Plan baten diseinuan eta ezarpenean lan egiteko. Gure helburua konfiantzan, lankidetzan, ongizatean eta etengabeko ikaskuntzan oinarritutako kultura sendotzea da, aldi berean jasangarritasunarekin, berdintasunarekin eta gizarte-erantzukizunarekin dugun konpromisoa indartuz. Hori guztia, energiaren biltegiratzean nazioarteko erreferente izateko dugun bokazio zientifikoa sendotuz.