OIER LAKUNTZA IRIGOIEN

Aurkezpena

Oier Lakuntza kimikako lizentziatura ikasi zuen (2007), eta Kimika Teoriko eta Konputazionaleko doktoretza egin zuen EHUn Jesus Ugalderen zuzendaritzapean. 2012ko irailaren 25ean defendatu zuen “Metanoaren aktibazioa 10. Taldeko metal hidrido hidroxido/sulfhidrido katioien bitartez katalizatuta” izenburudun tesia, cum laude kalifikazioa erdietsiz. Berau egiteko, Nafar Gobernuaren i+d doktoretza beka lortu zuen, eta tesiaren hirugarren urtean, mobilitate beka bat baliatuz, spin gurutzaketen kontzeptuan trebatzeko hiru hilabeteko egonaldia burutu zuen ICIQen Feliu Maserasen taldean.

2014ko urtarrilean Feliu Maserasen taldera itzuli zen ICIQera, bi urteko postdoc-a egitera. Bertan, metodo estatistikoak erabiliz, metal/ligando elkarrekintzarako deskriptore berrien bila lan egin zuen. Hau bukatuta, CIC energiGUNEra etorri zen 2017an Juan de la Cierva bekaren bitartez.

Honetaz gain, UNEDeko Kazetaritza eta Komunikazio Zientifikoa masterra ere egin zuen (2015). Gaur egun Elhuyarrekin kolaboratzen ari da, CIC energiGUNEn egiten denari gizarte mailan ikusgarritasuna eman asmoz.