1. Zein da gaur egungo erronka konposatu edo material aurreratu berriak garatzeko?
Gaur egun tresna digital indartsuak ditugun arren, material berriak diseinatzea prozesu oso konplexua izaten jarraitzen du. Espazio kimikoa ia infinitua da: hainbeste konbinazio posible daude, ezen kalkulu-potentzia edo esperimentuak soilik ez baitira nahikoak—jakitea zer bilatu behar den eta zergatik da funtsezkoa.
Hori dela eta, oinarrizko zerbait behar da: esperientzia zientifikoa. CIC energiGUNE-n Molekula-Diseinurako Aholkularitza Zerbitzua jarri dugu martxan, erronka horri ikuspegi estrategikoago eta eraginkorrago batekin aurre egiteko. Ez da soilik simulazioak egitea; galdera egokiak planteatzea, irizpide kimiko sendoak aplikatzea eta emaitzak industriarako edo ikerketarako benetako soluzio bihurtzea da helburua.
2. Zer eskaintzen du zerbitzu honek eta zer dauka berezi?
Ez dugu teknologia-tresna soil bat eskaintzen, baizik eta ezagutza zientifikoan eta adituaren laguntzan oinarritutako ikuspegi integral bat. Plataforma berri baten bidez, datu-baseak, tresna digitalak, barnean garatutako iragazki kimikoak eta, batez ere, gure taldearen interpretazio aditua uztartzen ditugu. Horrela, aukera kimikoak milaka milioi konbinaziotik ehunka konposatura murrizteko gai gara minutu gutxiren buruan.
Gaitasun horrek asko azkartzen du hautagaien azterketa eta hautaketa prozesua, zientziaren irizpideekin garatutako eta proiektu bakoitzaren beharretara egokitutako deskriptoreen bidez. Gure helburua ez da datu-bolumen handiak sortzea, baizik eta hautagai potentzialak identifikatzeko ezinbestekoak direnak soilik. Deskriptore horiek guztiz interpretagarriak dira, eta horrek aukera ematen digu hautagaien propietateen jatorria ulertzeko eta haiek ahalik eta modu eraginkorrenean hobetzeko estrategiak diseinatzeko.
3. Zein motatako konposatuak azter daitezke zerbitzu honen bidez eta zer aplikaziotarako?
Konposatu organikoak zein metal-konplexuak azter ditzakegu, zentzu zabalenean, honako eremuetarako: katalisia, energia, biomedikuntza, magnetismoa eta material jasangarriak. Gure aholkularitza-zerbitzuaren bidez, propietate fisiko jakinak dituzten konposatuak identifikatzen laguntzen dugu, baita katalizatzaile molekular aktiboago, sendoago eta merkeagoak ere. Guzti hau erronka ulertze argi batetik abiatuta egiten dugu, irtenbide bideragarri eta pertsonalizatuetara bideratuta.
4. Zein da DART tresnaren papera zerbitzu honetan?
DART gure Molekula-Diseinurako Aholkularitza Zerbitzuaren barruan erabiltzen dugun oinarri teknologikoetako bat da. Gure lankidetza estua dugun talde batek garatu du, eta gure lan-fluxura egokitu dugu bezeroen eta proiektuen behar errealetara. Ez dugu DART tresna isolatu gisa erabiltzen, baizik eta ikuspegi zabalago baten parte da, esperientzia kimikoa, datu-base propioak eta emaitzak lehenesteko iragazki adimendunen garapena uztartzen dituen sistema baten barruan.
Gainera, iragarpenak beste metodo eta saiakuntza osagarrien bidez baliozkotzen ditugu, aukeratutako konposatuak ez soilik teoriaren arabera interesgarriak direla, baizik eta praktikotasunez ere bideragarriak direla ziurtatzeko. Testuinguru horretan, DART tresnak azeleratzaile gisa funtzionatzen du: gure gaitasunak biderkatzen ditu eta aukera gehiago aztertzea ahalbidetzen digu denbora laburragoan. Baina bere balio errealak gure ikertzaileen irizpide zientifikoarekin integratzean datza, aukerak interpretatu, testuinguruan kokatu eta kasu bakoitzerako irtenbide zehatz bihurtzen dituztenean.
5. Zein motatako lankidetza edo proiektuk baliatu dezakete zerbitzu hau?
Gure aholkularitza-zerbitzua ikerketa-taldeei eta enpresei konposatu berriak azkar eta zehaztasunez garatzen laguntzeko pentsatuta dago. Prozesuak bizkortzeko, kostuak murrizteko, laborategiko saiakuntza eta erroreak gutxitzeko eta propietate zehatzak dituzten konposatuak esploratzeko bereziki erabilgarria da.
Ez da beharrezkoa aurretiazko esperientziarik izatea konputazio-kimikaren arloan; gure taldea arduratzen da erronkak zientzia-irizpideetan itzultzeaz, simulazio aurreratuko tresnak aplikatzeaz eta soluzio zehatz eta aplikagarriak emateaz. Teknologia eta adituen ezagutza uztartzen ditugu molekulen diseinuan berrikuntza eskuragarri, zorrotz eta emaitzetara bideratua izan dadin, farmazeutika, industria kimikoa, industria bera eta energia biltegiratzearen sektoreetan, besteak beste.
6. Zein da ekimen honen etorkizunerako ikuspegia zentroan?
Konposatu kimikoen diseinu adimendunerako sarbidea demokratizatu nahi dugu. Ez da soilik ezagutza sortzea, baizik eta ezagutza hori benetako soluzio teknologikoak garatzen dituztenen zerbitzura jartzea.
Gure ikuspegia da plataforma berri hau eta gure ikuspegi aholkularia uztartuz, aurkikuntza disruptiboak denbora errekorrean egitea posible izatea, proiektuen arrakasta-tasa handitzea eta diziplina arteko lankidetzarako bide berriak irekitzea.
Zerbitzu honek ez du laborategia ordezkatzen: indartu egiten du. Esploratu beharreko eremuak argiago ikusteko mapa bat edukitzea bezalakoa da, arrakasta-aukerarik handienarekin eta denbora laburragoan.
