Prozesu industrial askotan hondakin-bero asko sortzen da, hala nola ihes-gasak, ura edota solidoak (produktuak eta azpiproduktuak). Burdina, altzairua, zementua edo beira ekoizten diren sektoreak eszenatoki horren adierazgarri dira. Normalean, beroa sortzea eta berrerabiltzea ez dator bat denboran. Ondorioz, biltegiratze termikoko sistema bat inplementatzea oso garrantzitsua da. Behar bezala harrapatzen eta biltegiratzen bada, hondakin-beroa industrian bertan berrerabil daiteke, edo kanpoan merkaturatu, horri lotutako onurarekin, bai ingurumenari dagokionez, bai ekonomiari dagokionez. Erronka da ekonomikoki bideragarria den beroa berreskuratzeko sistema bat garatzea, beroaren bilketa, balizko biltegiratzea eta azken aplikazioa kontuan hartuko dituena.

Beroa berreskuratzeko sistema bideragarri batek sinplea eta ekonomikoa izan behar du, eta ez du oztopatu behar instalatzen den prozesu industriala. CIC energiGUNEk eta Sidenor I+G erakundeak, RFCS ECOSLAG Europako proiektuaren barruan, galdatutako zeparen beroa berreskuratzeko kontzeptu berri bat garatu dute, zepa-ontziaren lurzoruan sartutako trukagailu bat erabiliz. Irtenbide horrek arestian aipatutako baldintzak betetzen ditu. Hartutako beroa ura aurreberotzeko erabiltzen da, lurrungailuetan gas naturalaren kontsumoa murriztuz.