CIC energiGUNEn hainbat urte daramatzagu lanean prozesu industrialen eraginkortasun energetikoa hobetzeko. Lan hori ikusarazi nahi genuke, eta modurik eraginkorrena, beharbada, gure ikerketa irudikatzen duten bi erakusle nabarmentzea da.

Termoklina teknologian oinarritutako biltegiratze termikoko sistemen ikerketa berritzailean oinarrituta dauden eta CIC energiGUNEk osorik garatu dituen frogagailuez ari gara.

Biltegiratze termikoaren eremuko Sistemen Ingeniaritzako eta Teknologiaren Transferentziako ikerketa-taldeak materialak ikertu ditu, eta fluido bero-emaileekin bateragarriak diren aztertu du, baita sistemaren diseinua eta modelizazioa ere. Halaber, gure prototipatze eta test termikoak egiteko laborategian, industriaurreko eskalan egin dira frogak, Ben Guerirrek Marokon duen eguzki-kontzentrazioko instalazioan eta ArcelorMittalen, Sestaon (Bizkaia,) martxan jarri aurretik datuak baliozkotuz. 20 MWh-ko eta 1 MWh-ko biltegiratze termikoko sistemez ari gara, energia-trantsizioari buruzko ikerketa disruptiboaren bidez lagundu daitekeela erakusten dutenak.

Eta irudi batek mila hitzek baino gehiago balio duenez, bideo bat prestatu dugu lortutakoa nabarmendu ahal izateko.

Baina has gaitezen hasieratik.

2015ean aurreko hausnarketa estrategikoari aurre egin behar genionean, antzeman genezakeen biltegiratze termikoaren aldeko apustuak, eraginkortasun energetikoa hobetzeko modu gisa, emaitzak izango zituela epe ertainean.

Garai hartan, CIC energiGUNEk etorkizun handiko biltegiratze termikoko eremu bat zuen, baita paradigma aldaketa horrekin konprometitutako ikertzaile talde bat ere. ORC-plus eta RESLAG proiektuak abiarazten ari ziren. Taldean emozioaren, erantzukizunaren eta ikerketa-arlo honetan gure balioa erakusteko aukeraren artean bizi ginen. RESLAG, gainera, CIC energiGUNEk bere historia osoan buru zuen Europako lehen proiektua zen. Proiektu horrek, gainera, ArcelorMittal eta Novargi bezalako euskal enpresak (azken honen papera EIA 21 bezalako beste euskal enpresa batek bere gain hartu zuen) eta Azterlan bezalako BRTAko zentroak bultzatzen zituen.

Aurreratu dugun bezala, proiektu hauetan termoklina-sistema berri bat erabiltzen da, gure ikertzaileek garatua, bero-kantitate handiak biltzeko aukera ematen duena, harriak edo altzairugintzako zepak bezalako materialei bigarren bizitza bat emanez. Sistema horiek agerian uzten dute olio termikoa ez ezik airea ere fluido bero-emaile bikaina izan daitekeela, nahiz eta oraindik erronka garrantzitsuak dituen, CIC energiGUNEn gainditzen laguntzen ari garena.

Proiektu horiek 2016an hasi zirenetik 2020an amaitu arte gauza asko gertatu dira: Siemensek 2019an antzeko soluzio baten aldeko apustua egin zuen. Europar Batasunak Green Deal-a onartu zuen 2019. urtearen amaieran, energia-eraginkortasuna % 32,5 hobetzea helburu hartuta. Estatuak PNIECa onartu zuen, eraginkortasun energetikoari dagokionez asmo handiagoko helburuak ezarriz (% 39,5). Era berean, Eusko Jaurlaritza bera energia- eta klima-politika integratuak lantzen hasi zen estreinatu berri zen Ekonomiaren Garapen, Iraunkortasun eta Ingurumen Sailean.

Aldi berean, CIC energiGUNEn ere gauza asko gertatu ziren. 2017an, Elena Palomo zuzendari zientifikoa, Ikerbasque Research Professor eta Stanford Elsevierren 2020ko rankingaren arabera munduko ikertzaile eraginkorrenetako bat, sartu zen taldean. Berak, biltegiratze termikoaren arloko gainerako ikertzaileekin batera, nazioartean aintzatespen zientifikoan aurrera egin du.

Palomo irakaslearen gidaritzapean, eta Daniel Bielsa gure biltegiratze termikoaren eremuko transferentzia-koordinatzailearen gidaritzapean, taldeak erakutsi du bere gaitasunak dituela materialetan, modelizazioan eta energia termikoa biltegiratzeko sistemetan, biltegiratze termikoko soluzio disruptiboak emanez, industriarentzat erabilgarriak direnak, hain zuzen ere. Hemendik, eskerrak eman nahi nizkioke etorkizunean arrakasta berriak espero ditudan biltegiratze termikoaren arloko talde osoari.

CIC energiGUNEn baikorrak gara, eta pentsatzen dugu biltegiratze termikoko irtenbide mota horiek bultzada handia izango direla Europar Batasunak, Estatuak eta Euskadik ezarritako energia-eraginkortasuneko helburuetan aurrera egiteko. Hori funtsezkoa da guretzat eta etorkizuneko belaunaldientzat. Gure enpresentzat energia-eraginkortasunaren arloan aukera berriak sortzeko konpromisoa hartu dugu.

Gure industriarako ikerketa disruptiboa eta aldi berean erabilgarria egitea posible delako. CIC energiGUNEn egunez egun erakusten dugu hori, iraunkortasuna errealitate bihurtuz.

Egilea: Nuria Gisbert, CIC energiGUNEko zuzendari nagusia; Energiaren Euskal Itunaren legebiltzarreko aditu-taldeko kidea eta Euskal Autonomia Erkidegoko Zientzia, Teknologia eta Berrikuntzarako Euskal Kontseiluko Aholkularitza Batzorde Zientifikoko kidea.